Ҳамкории Тоҷикистону Чин густариш меёбад

Душанбе, 13.11.2015. (АМИТ «Ховар).- Дирӯз вазири рушди иқтисод ва савдои кишвар Неъматулло Ҳикматуллозода бо Сафири фавқулодда ва мухтори Ҷумҳурии Мардумии Чин дар Ҷумҳурии Тоҷикистон Фан Сянжун мулоқот намуд.
Ҷонибҳо дар атрофи масъалаҳои густариши ҳамкории иқтисодию тиҷоратӣ, махсусан дар соҳаҳои ҷалби сармоягузорӣ, коркарди маҳсулоти кишоварзӣ, омодагӣ ба ҷаласаи навбатии Комиссияи байниҳукуматии Чину Тоҷикистон оид ба ҳамкории тиҷоратию иқтисодӣ мубодилаи афкор намуданд.
Дар вохӯрӣ тарафҳо азми қавии худро барои густариши минбаъдаи ҳамкорӣ дар самтҳои гуногун баён доштанд.