Ҳамвора парчами Тоҷикистон парафшон бод!

Б. Ғафуров, 24.11.2015. (АМИТ «Ховар»).- Ба ифтихори Рӯзи Парчами давлатии Ҷумҳурии Тоҷикистон дар амфитеатри ноҳияи Бобоҷон Ғафуров, воқеъ дар паҳлӯи Қасри овозадори Арбоб чорабинии тантанавӣ доир гашт. Тавре ки ба АМИТ Ховар аз Раёсати кор бо ҷавонон, варзиш ва сайёҳии вилояти Суғд иттилоъ доданд, дар чорабинии мазкур беш аз панҷ ҳазор ҷавон, варзишгарон, фаъолони ва сокинони ноҳия ширкат доштанд. 
 Раиси ноҳия Абдусамад Маннонзода зимни табрик бо ҷашни парчам изҳор  дошт, ки Парчами нурафшони Истиқлолият дар дилу дидаи ҳар як сокини шаҳр меҳру эҳтиром ба Ватани маҳбубро афзун гардонида, дар фазои озоди кишвар бигузор ҳамвора парафшонӣ намояд.
Иштирокдорон изҳор карданд, ки Парчами миллӣ нахустин нишони муқаддаси ҳар кишвару мардум ба ҳисоб рафта, он пеш аз ҳама таҷассумгари симои сиёсӣ, ифодакунандаи рамзи ҳувият, давлатдорӣ ва ягонагии халқҳои як сарзамин ба шумор меравад. Аз ин рӯст, ки парчами миллии давлатамон аз ҳар яки мо одоби хоссаи муносибатро талаб дорад.