Бозёфти сиккаҳои шоҳони кӯшонӣ аз Чимқурғони Шаҳринав

Душанбе, 3.11.2015  (АМИТ  «Ховар»).- Бостоншиносони  Осорхонаи  миллии  Тоҷикистон бо сардории  доктори илми  таърих  Давлатхоҷа  Довудӣ  бахшида  ба  3000-  солагии  Ҳисор аз 10 август  то  30  сентябри  соли 2015 дар бостоншаҳри  Чимқурғони ноҳияи Шаҳринав ҳафриёт гузаронданд. Дар натиҷа анбори шоҳӣ бо зиёда аз 20 хум кашф гардид. Ҳамчунин шумораи зиёди зарфҳои сафолӣ — хумҳо, хумчаҳо, косаҳо, ҷомҳо, кӯзачаҳо, миҷмари оташ, дукҳои бофандагӣ, ангуштариҳои нигиндори биринҷӣ, пораи ханҷари оҳанӣ, ҳайкалчаи гилии  мард, сиккаҳои нуқрагии шоҳони Бохтар- Деметрий ва Евкратид,   сиккаи мисии Евтидем, сиккаҳои миссии шоҳони кӯшонӣ  Вима Такту- Сотер Мегас, Вима Кадфиз, Канишка, Васудева  ёфт шуданд. 
Сиккаҳо ба охири асри III п.м.  —  II мелод тааллуқ доранд.  Дар асоси сиккаҳо ва осори дигар муайян карда шуд, ки Чимқурғон ба давраи Кӯшониён тааллуқ дошта, аз калонтарин шаҳрҳои водии Ҳисор будааст.