Бунёди маҷмааи қаҳрамони халқи тоҷик Темурмалик ҳусни Хуҷандро бештар хоҳад кард

Душанбе, 5.11.2015. (АМИТ «Ховар»).- Шаҳраки донишҷӯёнро, ки дар миёни маҳаллаҳои 19-20 ва 17-уми соҳили рости шаҳри Хуҷанд воқеъ аст, бунёди боз як иншооти таърихию фарҳангии меъморӣ ҳусну таровати бештар хоҳад бахшид.
Бо иқдоми роҳбарияти вилоят дар ин макон маҷмааи меъморию таърихии қаҳрамони халқи тоҷик Темурмалик қомат хоҳад афрохт. Маҷмаа аз пайкараи Темурмалик бо киштӣ, дарёчаи рамзӣ, чеҳраҳои ҳамсафони муборизи ӯ ва дигар бахшҳои фарҳангию фароғатӣ мураттаб мегардад. Иқдоми мазкур пеш аз ҳама барои донишҷӯёне, ки дар мактабҳои олии ин мавзеъ таҳсил мекунанд, таъсиргузор мешавад ва онҳоро дар руҳияи худшиносию ватанпарварӣ ва дӯст доштани арзишҳои таърихии миллӣ тарбият хоҳад кард, зеро корномаи Темурмалики муҳофизу мубориз ва ҷоннисори роҳи озодии Ватан барои насли имрӯз дарси далерию мардонагист. Эҳёи арзишҳои таърихӣ  арҷгузорӣ ба гузаштаи пурифтихори миллат аст.
Тибқи иттилои Хадамоти матбуоти раиси вилояти Суғд, роҳбари вилоят Абдураҳмон Қодирӣ ба масъулини сохтмон, олимону таърихшиносон, меъморон ва аҳли адаб дастур дод, ки ҳангоми амалисозии корҳои лоиҳакашӣ ва тарҳрезӣ хусусиятҳои аслию таърихии замони Темурмаликро ба назар гиранд ва ин макони тамошобоб барои кулли шаҳрвандон дастрасу оммавӣ гардад.