Дар Ҷиргатол 61 муассисаи таҳсилоти умумӣ фаъол аст

Ҷиргатол, 11.11.2015. (АМИТ «Ховар»).- Дар соли хониши  2015 — 2016  дар ноҳияи  Ҷиргатол  61  муассисаи  таҳсилоти умумӣ  фаъолият дорад. Аз ин шумора  мактабҳои таълимашон бо забони  тоҷикӣ  20 адад,  бо забони тоҷикию қирғизӣ 18 адад  ва бо забони қирғизӣ  23 ададро ташкил медиҳанд, ки дар онҳо хонандагон бо забони тоҷикию қирғизӣ  таълим мегиранд.   
Барои боз ҳам  беҳтар намудани  кори таълиму тарбия дар соли  хониши  2015 — 2016   бо дастгирии мақомоти маҳаллӣ  ду муассисаи ибтидоӣ  дар деҳаҳои Яраш ва Ҷолборстӣ ба муассисаи асосӣ табдил дода шуд. Инчунин  ду муассисаи  томактабӣ дар деҳаҳои Чоргул ва Ёрмазор  ва як  муассисаи таҳсилоти ибтидоӣ дар деҳаи  Сарғойи поён аз нав таъсис дода шуд.
Бо мақсади  бо кадрҳои  дорои маълумоти олӣ  таъмин намудани  мактабҳои ноҳия  1143  донишҷӯй дар мактабҳои олии кишвар, дар Ҷумҳурии Қирғизистон  375 нафар ва дар коллеҷҳо 302  донишҷӯ  бо муваффақият таҳсил доранд, ки зиёда аз 500 нафарашон  дар соҳаи омӯзгорӣ мехонанд, ки  аз ин ҳисоб дар оянда мушкилоти кадрии соҳаи маорифи ноҳия бартараф хоҳад шуд.  
Соли равон масъулини маорифи ноҳияи Ҷиргатол  70 омӯзгори  ҷавон ва  14 донишҷӯи шуъбаи  ғоибонаро бо  кори доимӣ таъмин намуданд.