Хуҷанд: Дар зимистон 100 ҳазор дона гулҳои ороишӣ шинонида мешаванд

Душанбе, 12.11.2015. (АМИТ «Ховар»).-Дар асоси нақшаи Мақомоти иҷроияи ҳокимияти давлатии шаҳри Хуҷанд кормандони муассисаи сабзазоркунӣ дар кӯчаю хиёбонҳои шаҳр ба шинондани  гулҳои ба сармо тобовар машғуланд.
Дафтари матбуоти шаҳрдорӣ хабар медиҳад, ки кормандони ин муассиса барои сари вақт таъмин намудани гулу буттаҳои орошӣ дар фасли баҳори соли оянда ба чидану захира намудани тухмии гулҳои ороишӣ шурӯъ намуданд.
 Кормандони муассисаи сабзазоркунии шаҳр ба шинондани гулҳои орошии зимистонаи навъҳои «Гулкарам», «Хрезантема» ва «Нагатки»  идома  дода, ният доранд дар давоми моҳи равон шаҳрро бо беш аз 100 ҳазор гулҳои ба сармо тобовар оро диҳанд.
То кунун дар хиёбони ба номи Исмоили Сомонӣ, кӯчаи ба номи Султон Умарӣ, хиёбони ба номи Раҳим Ҷалил «Гулкарам» шинонида шудааст.
Зимнан, соли равон аз ҷониби раиси вилояти Суғд Абдураҳмон Қодирӣ Соли гулҳо эълон гардидаву дар доираи он дар ҳамаи шаҳру ноҳияҳо барои баланд бардоштани ҳисси зебопарастии аҳолӣ корҳои назаррас ба сомон расонида шуданд.