Ҷилои се ранги Парчами миллӣ дар «Наврӯзгоҳ»

Душанбе, 24.11.2015 (АМИТ «Ховар»).-Шоми имрӯз маҷмааи «Наврӯзгоҳ»-и пойтахт ба макони зебои чароғон табдил ёфта, дар он асосан се ранг-сурх, сафед ва сабз бо тамоми ҷило равшанӣ доданд. 
Пас аз суханронии Сарвари давлат Эмомалӣ Раҳмон, ки Парчами миллиро “нишонаи нангу номус ва адолату осоиш» унвон карда,  аз гуфтаи ниёгонамон панд овард, ки: «парафшонии парчам ба сарбаландии ҳар як фард баробар аст» ва пояи баланди онро “рамзи ифтихору садоқат ба арзишҳои миллӣ ва фарҳанги асили куҳанбунёдамон” маънӣ дод, дар майдон намоиши мусиқӣ оғоз гардид.  
Варзишгарони мамлакат, ки либосашон баргирифта аз рангҳои парчами давлатии мост, Парчами миллиамонро бо тамоми шаҳомат нишон доданд. Тамошобинон аз нишемангоҳҳо бо парчамафшониҳо онҳоро дастгирӣ ва руҳбаланд сохтанд. Дар майдон асосан сурудҳо дар васфи Парчам, Ватан, Модар ва дигар арзишҳои бо онҳо баробар садо доданд.  
Шилликандозии рангоранг аз тӯпхонаҳо дар осмони болои шаҳри Душанбе ба фазои идонаи бахшида ба Рӯзи Парчами давлатии Тоҷикистон шукӯҳи хоса бахшид.