Қисми низомии 6592-и қӯшунҳои дохилии ВКД замонавӣ гардонида мешавад

Душанбе, 4.11.2015. (АМИТ «Ховар»).-Дирӯз, 3 ноябри соли равон вазири корҳои дохилӣ Раҳимзода Рамазон Ҳамро дар арафаи Рӯзи милитсия аз қисми низомии 6592-и Раёсати қӯшунҳои дохилии Вазорати корҳои дохилӣ  боздид кард.
Дар қисми низомии 6592-и Раёсати қӯшунҳои дохилии Вазорати корҳои дохилӣ барои беҳтар намудани шароити хизматии сарбозону афсарон ва ба талаботи замона ҷавобгӯ гардонидани он корҳои ободонию созандагӣ ва таъмиру таҷдид бомаром идома доранд.
Вазири корҳои дохилӣ зимни боздид аз як қисмати корҳои таъмиру навсозии қисми низомии мазкур, ки бо сифати баланд анҷом ёфтаанд, изҳори қаноатмандӣ намуд.   
Р. Раҳимзода бо афсарону сарбозони қисми низомии мазкур вохӯрда, онҳоро бо фарорасии Иди касбии милитсия, ки 10 ноябр таҷлил мешавад, табрик гуфт.
Зикр гардид, ки Ҳукумати Ҷумҳурии Тоҷикистон барои беҳбудӣ бахшидани шароити хизматии афсарону сарбозони қисмҳои низомии Раёсати қӯшунҳои дохилӣ тамоми тадбирҳои заруриро меандешад, то онҳо дар шароити мусоид хизмати Ватан-Модарро содиқона ва сарбаландона адо намоянд. 
Ҳоло корҳои ободонию созандагӣ дар қисми низомии 6592-и Раёсати қӯшунҳои дохилии Вазорати корҳои дохилӣ идома доранд.