«Маърифати молиявӣ» — семинар барои донишҷӯёни фаъол

Душанбе, 18.11.2015. (АМИТ «Ховар»).-Дар Донишкадаи молия ва иқтисоди Тоҷикистон дар мавзӯи «Маърифати молиявӣ» барои донишҷӯёни фаъоли маҳфилҳои илмии донишкада семинари омӯзишӣ доир гардид. 
Семинар бо ташаббуси шуъбаи корҳои илмӣ-тадқиқотӣ ва ҷамъияти илмии донишкада, Ассотсиатсияи соҳибкорони хурду миёна ва Ташкилоти амонатии хурди қарзии «Ҳумо» доир гардида, сардори шуъбаи корҳои илмӣ-тадқиқотӣ Қутбиддин Муқимов  баргузории чорабиниро муҳим арзёбӣ кард.
 Раиси Ассотсиатсияи соҳибкории хурду миёна Матлуба Ӯлҷабоева  гуфт, ки: «Анҷумани мо тасмим гирифтааст бо маҳфилҳои илмии донишкада ҳамкориро бештар созад. Мо то ин вақт бо ширкатҳои бузург ҳамкорӣ доштем. Чорабинӣ дар доираи ҳафтаи байналмилалии соҳибкорӣ гузаронида мешавад, ки шурӯъ аз 18 ноябр бо дастгирии Сафорати ИМА дар Тоҷикистон оғоз мегардад».
Намояндагони ташкилоти амонатии қарзии хурди «Ҳумо» Ҷамшед Маҳмадиев ва Ирина Пилиева доир ба ташкилоти худ маълумот дода, донишҷӯёнро барои дар оянда ҳамкорӣ кардан бо онҳо даъват намуданд. Зикр гардид, ки самтҳои асосии фаъолияти ин ташкилоти хурди молиявӣ барномаҳои иҷтимоӣ буда, ба дастгирии соҳибкории хурд, кишоварзӣ ва баробарии гендерӣ равона гаштааст. Ташкилот дар тамоми ҷумҳурӣ 830  корманд ва беш аз 42 ҳазор мизоҷи доимӣ дорад.