Парчам нишонаи соҳибдавлатист

Душанбе, 23.11.2015. (АМИТ «Ховар).- Бахшида ба рӯзи Парчами давлатии Ҷумҳурии Тоҷикистон дар Донишкадаи молия ва иқтисоди Тоҷикистон мизи мудаввар  баргузор шуд. Дар ҷамъомад сардори шуъбаи магистратура Муҳаммадӣ Ашуров, мудири шуъбаи табъу нашр Саъдулло Носиров изҳор карданд, ки парчам ин нишонаи таърих ва соҳибдавлат будани ҳар як миллатро инъикос мекунад ва кишвари азизи мо низ бо парчами худ дар тамоми чаҳон ҷойгоҳи хоси худро касб кардааст. 
Маърӯзаҳо дар мавзӯи  «Таърихи парчам», «Парчами давлатии Тоҷикистон» «Парчами миллӣ- нишонаи соҳибистиқлолии тоҷикон» аз ҷониби магистрантони донишкада шунида шуданд. Зикр гардид, ки  парчам аз ҷумлаи муқаддасоти миллист ва инсоният онро ҳамчун ливои озодӣ барои амалӣ намудани мақсаду ормонҳои худ баҳри ҳаёти осоишта ва таъмини адолат истифода мебарад. Гузаштагони мо низ дар парчами худ ранги сурху зард ва бунафшу кабудро ҳамчун ойини ҷавонмардиву тавоноӣ ба кор мебурданд. Моро мебояд, ки ба ин муқаддасот арҷгузорӣ карда, парафшонии онро дар тамоми олам таъмин созем.