Прокуратураи Париж марги 128 нафарро дар амалҳои террористӣ тасдиқ кард

Душанбе, 14.11.2015. (АМИТ «Ховар»).  Теъдоди пешакии қурбониёни амалҳои террористии Фаронса ба 128 нафар расида, 99 нафари дигар дар ҳолати вазнин қарор доранд. Дар ин бора агентии хабарии «Рейтер» бо истинод ба манбаъ аз Прокуратураи Париж иттилоъ медиҳад.
Чанде пеш манбаъ иттилоъ дода буд, ки 127 нафар ҳалок гардида, 250 тани дигар маҷруҳ шудаанд, ки аз ин теъдод 80 нафарашон дар ҳолати вазнин қарор доранд.
Шоми 13-уми ноябр шахсони номаълум дар яке аз тарабхонаҳои пойтахти Фаронса шаҳри Париж тир кушоданд. Ҳамзамон 3 таркиш дар наздикии варзишгоҳи «Стад де Франс», ки дар он бозии рафиқонаи Фаронса ва Олмон бо иштироки Президенти Фаронса Франсуа Олланд мегузашт, ба амал омад. Ба ғайр аз ин, дар рок консерти театри «Батаклан» шахсони номаълум мардуми осоиштаро гаравгон гирифта, зиёда аз 100 нафари онҳоро куштанд.