Сафорати Тоҷикистон дар Русия: 4 шаҳрванди Тоҷикистон аз Яман берун оварда шуданд

Душанбе, 9. 11. 2015. (АМИТ «Ховар»).-Шаби 6 ба 7 ноябри соли равон боз 4 шаҳрванди Тоҷикистон тавассути ҳавопаймои Вазорати ҳолатҳои фавқулоддаи Русия аз Яман берун оварда шуданд. Онҳоро дар фурудгоҳи баналмилалии Домодедово масъули Хадамоти консулии Сафорати Тоҷикистон дар Русия Бахтиёр Муродов истиқбол намуда, барояшон хуҷҷатхои лозимиро барои гузаштани нуқтаи бунгоҳи сарҳадии фурудгоҳ фароҳам овардааст. Шаҳрвандони Тоҷикистон Даврон Азамов, Жанна Кудзиева, Ал Бухорӣ Хания, Алан Битсоев, ки солҳои сол дар Яман кору иқомат доштанд, аз он ки сиҳату саломат то ба Маскав расиданд, аз мақомоти дипломатии Русияву Тоҷикистон арзи сипос мекунанд. 
Даврон Азимов тавассути хатсайри Маскав -Кӯлоб фиристода шуд. Алан Битсоев озими шахри Перм гардид ва Жанна Кудзиева ҳамроҳи духтараш Ал Бухорӣ Хания дар меҳмонхонаи «Тоҷикистон» дар Маскав ҷой дода шуданд.  Ин ҳар ду низ рӯзҳои наздик нияти бозгашт ба Ватанро доранд.
Муҳаммад Эгамзод, намояндаи расмии Сафорати Тоҷикистон дар Русия гуфт, ин масъала чанд муддат аст дар доираи ҳамкории пайвастаи намояндагии дипломатии Тоҷикистон дар Русия бо Вазорати умури хориҷии ин кишвар мавриди баррасӣ қарор дошт. «Мо аз мақомоти Русия барои ҳамкории судманд дар ин самт арзи сипос менамоем, зеро пеш аз ин низ шаҳрвандони Тоҷикистон, ки дар Яман фаъолият мекарданд, дар натиҷаи ҳамкории судманд миёни ниҳодҳои дипломатии Вазорати ҳолатҳои фавқулоддаи Русия аз ин кишвар берун оварда шуданд.