Сергей Наришкин: вокуниши низомии Русия бар зидди Туркия ҳаққи мост

Душанбе, 28.11.2015. (АМИТ «Ховар»). — Сергей Наришкин, раиси  Думаи  Русия рўзи ҷумъа дар мусоҳибае бо шабакаи телевизионии Руминия  «Ди Ҷи 24» дар бораи сарозер кардани  ҳавопаймойи  Русия аз ҷониби Туркия гуфт: «Ин куштори дидаю донистаи сарбозони мо буд ва ин амалест, ки бояд ҷазо дода шавад».
Вай  гуфт,  Маскав  манбаъҳои  низомии бештареро барои афзоиши амнияти ҳавопаймоҳои  низомии худ ҷудо намудааст.
Юрий  Ушаков,  ёвари Владимир Путин, президенти Русия низ  гуфт, Путин аз посух додан ба тамоси  Раҷаб Тайип  Эрдуғон, раиси ҷумҳури Туркия худдорӣ кардааст,  чаро ки Анқара  намехоҳад ба далели  сарозер кардани  ҳавопаймои  русӣ  узрхоҳӣ кунад.
Ушаков  ҳамчунин аз дархости Анқара барои дидори сарони Туркия ва Русия  дар душанбеи  оянда дар конфронсе  дар бораи иқлим дар Париж хабар дод.
Ба гуфтаи ёвари  Путин, президенти Русия дар Париж  бо Бинёмин Нетанёҳу, нахуствазири  Исроил дидор ва дар бораи бӯҳрони Сурия ва муноқишаи Исроил ва Фаластин  гуфтугӯ хоҳад кард. Путин ҳамчунин дар дидори Ангела Меркел, садри аъзами Олмон  дар мавриди Сурия ва Украина гуфтугў  хоҳад дошт.