Шаҳрдорӣ ҷудо кардани қитъаи заминро мавқуф мегузорад

Душанбе, 11.11.2015.(АМИТ «Ховар»).-Шурӯъ аз фардо раванди ҷудо кардани қитъаи замин барои сохтмони биноҳои истиқоматӣ ва ғайриистиқоматӣ дар пойтахт мавқуф гузошта мешавад. Дар ин хусус Маҳмадсаид Убайдуллоев -раиси шаҳри Душанбе қарор қабул намуд. Ин тадбир бо мақсади беҳдошти раванди муттасили таъмини маҳалҳои аҳолинишини пойтахт бо иншооти инфрасохторҳои муҳандисӣ, нақлиётӣ, иҷтимоӣ, риояи талаботи меъёр ва қоидаҳои сохтмонӣ, амнияти ҳудудҳо ва нигоҳ доштани объектҳои мероси фарҳангӣ андешида шудааст.  Тибқи ин қарор раиси шаҳр ба масъулини шуъбаи сохтмони пойтахт супориш додааст, ки дар мувофиқа бо Кумитаи меъморӣ ва сохтмони назди Ҳукумати ҷумҳурӣ, барои муайян намудани муҳлат ва гузаронидани бақайдгирии нақшаҳои шаҳрсозӣ, дар назди Сарраёсати меъморӣ ва шаҳрсозии пойтахт гурӯҳи корӣ таъсис дода, то 30 ноябри соли равон аз натиҷаи он  ба Кумитаи меъморӣ ва сохтмон маълумот пешниҳод созад.