Шиносоии А.Қодирӣ бо шароити бошишгоҳи аскарони қисми низомӣ

Душанбе, 27. 11. 2015. (АМИТ «Ховар»).- Раиси вилояти Суғд Абдураҳмон Қодирӣ дар шаҳраки Палоси шаҳри Чкалов бо шароити бошишгоҳи аскарони қисми низомии Агентии таъминоти амволи махсуси назди Ҳукумати Ҷумҳурии Тоҷикистон шинос гардид.
Дар  бинои мазкур ҳамаи шароит баҳри пешбурди хизмати ҳарбӣ фароҳам оварда шуда, иншоот дорои утоқҳои барҳавои корӣ, хобгоҳ, ошхона, ҳуҷраҳои алоҳидаи машғулиятгузарониву маишӣ мебошад. Дар ин қисми низомӣ, сарбозон баробари адои хизмати Ватан ҳамчунин чандин касбҳо, аз қабили кафшергарӣ, кишоварзӣ, байторӣ, техникиро аз худ намуда, пас аз хатми хизмат соҳибкасб мегарданд ва бо сертификат таъмин мешаванд, ки он дар оянда барои пешбурди зиндагиашон мусоидат менамояд.
Баҳри бунёди коргоҳи нави дӯзандагӣ, бинои нави қисми ҳарбӣ ва дигар иншооти ёрирасон то имрӯз беш аз 1 миллион сомонӣ маблағ масраф гардида, корҳои ободонӣ дар оянда низ ба роҳ монда мешаванд.