Суғд: Иштироки 25 ҳазор шаҳрванд дар иқдоми Тозагии маҳал

 Суғд, 4.11.2015. (АМИТ «Ховар»).-Бахшида ба рӯзи Сарқонуни ҶТ  ва иҷрои қарори  раиси вилоят дар бораи эълони 500 рӯзи меҳнати зарбдор ва инчунин истиқболи 25- солагии истиқлолияти ҶТ  дар ҳудуди шаҳру навоҳии вилояти Суғд  иқдомҳои Тозагии маҳал ва тозагии соҳил  доир гардиданд. 
Тибқи маълумоти раёсати муҳити зисти вилоят, дар тӯли гузариши  аксияи  мазкур  дар ҳудуди вилоят наздик ба 25 ҳазор нафар аҳолии шаҳру ноҳияҳо, аз ҷумла кормандони ташкилоту муассисаҳои гуногун, толибилмони макотибу коллеҷҳо ва соҳибкорон  ширкат варзиданд. Зимни баргузории чорабинии мазкур  дар натиҷа беш аз 11 км роҳҳо, 22,5 км соҳили дарё, канал, сой ва селроҳаҳо ,  14,1 км ҷӯйборхо, зиёда аз 640 метри мураббаъ ҳудуди ташкилоту корхонаҳо аз партовгоҳ тоза  шуда,  479,4 метри мукааб  партовҳо ба партовгоҳҳо бароварда шуданд.