Террористон «хуб» ва ё «бад» намешаванд

Душанбе, 14.11.2015 (АМИТ «Ховар»).-Силсилаи амалҳои террористии дар Париж рӯйдода зарурати нобуд кардани террористонро, дар куҷое, ки набошанд, тасдиқ мекунад,-гуфтааст раиси кумитаи Парлумони палатаи болоии Федератсияи Русия Андрей Клишас. Дар ин бора сомонаи иттилотии «Russian.com» иттилоъ дода, суханони зерини сенатор Клишасро иқтибос кардааст, ки: «террористон «хуб» ва ё «бад» намешаванд, онҳоро набояд ба террористони «радикалӣ» ва ё «муътадил» ҷудо кард, балки кишварҳои ҷаҳонро мебояд ин вабои асри 21-ро аз решааш несту нобуд кунанд, зеро террористон дар ҳама ҷо ҳамлаҳои террористӣ содир карда, ба сокинони осоишта зарар мерасонанд ва одамони бегуноҳро қатл мекунанд».
Силсилаи амалҳои мудҳиши террористӣ, ки шоми дирӯз дар Париж руй доданд, ҷомеаи ҷаҳониро нигарон карда, хатари ҷиддӣ доштани созмонҳои террористии ДИИШ, «Ал-қоида» ва монанди инҳоро барои инсоният возеҳ нишон дод. Як гурӯҳи коршиносон чунин мешуморанд, ки терроризм бар зидди  ҷомеаи мутамаддини ҷаҳонӣ ҷанг эълон кардааст ва роҳбарони ҳама кишварҳоро мебояд муборизаи якҷояро ба муқобили ин вабои аср роҳандозӣ кунанд.