Вазорати корҳои дохилӣ бобати гузаронидани ислоҳоти милитсия як қадам пеш аст

Душанбе, 27.11.2015. (АМИТ «Ховар»). — «Мақомоти корҳои дохилӣ аз муҳимтарин сохторҳои ҳифзи ҳуқуқ ба ҳисоб рафта, дар самти бунёди ҷомеаи демократӣ ва ҳуқуқбунёд нақши муҳим дорад. Мақомоти корҳои дохилӣ дар мубориза бар зидди терроризм, экстремизм, гардиши ғайриқонунии маводи мухаддир ва дигар ҷиноятҳое, ки ба амнияти давлат ва кишвар хатар эҷод менамоянд, саҳми назаррас мегузорад»,- гуфт раиси Суди Олии Ҷумҳурии Тоҷикистон Шермуҳаммад Шоҳиён имрӯз зимни маърӯзаи худ дар конфронси илмӣ-амалии байналмилалӣ дар мавзӯи «Масоили мубрами ислоҳоти мақомоти корҳои дохилии Ҷумҳурии Тоҷикистон».
Ҳамчунин муовини Прокурори генералии Ҷумҳурии Тоҷикистон Валӣ Ваҳҳобов оид ба ислоҳоти милитсия дар мақомоти корҳои дохилӣ андешаронӣ карда, ҳамчунин гуфт, ки Вазорати корҳои дохилӣ бобати гузаронидани ислоҳоти милитсия дар мақомоти корҳои дохилӣ дар раванди таҳкими қонуният, конститутсия ва тартиботи ҳуқуқӣ як қадам пеш маҳсуб мешавад.