ВКД: Ҳодисаҳои дуздии маблағи пулӣ

Душанбе, 13.11.2015. (АМИТ «Ховар»). — Ба ШВКД дар шаҳри Хуҷанд, сокини 25-солаи ҳамин шаҳр муроҷиат намудааст, ки шаби 9 ба 10-уми ноябри соли равон шахсони номаълум бо роҳи пинҳонӣ оинаи мошини шахсиаш- тамғаи Опел-Астра-ро, ки дар назди бинои истиқоматиаш беназорат меистод, шикаста, аз дохили он 3900 доллари ИМА-ро дуздида, аз ҷойи ҳодиса ғайб задаанд. Зимни гузаронидани чорабиниҳои фаврӣ-ҷустуҷӯӣ дар гумонбарӣ ба ҷинояти дуздии мазкур сокини 17 солаи ш.Хуҷанд, донишҷӯ,дастгир карда шуд. 
Ҳамчунин зимни як чорабинии фаврии дигар кормандони милитсия бо гумони дуздӣ ду сокини 24 ва 27-солаи ноҳияи Фархорро дастгир намуданд. Муайян шуд, ки гумонбаршудагон 10 ноябри соли равон  бо роҳи пинҳонӣ вориди хонаи зани 43-солаи сокини ноҳияи Фархор шуда, аз он ҷо 3730 сомонӣ пули нақдашро дуздида, аз ҷойи ҳодиса ғайб задаанд.
Нисбат ба далелҳои мазкур парвандаи ҷиноятӣ оғоз гардида, тафтиш давом дорад.