Вохӯрии ҳайати расмии Ҷумҳурии Тоҷикистон бо мудири кулли ЮНЕСКО

Душанбе, 3.11.2015. (АМИТ «Ховар»).-3 ноябри соли 2015 ҳайати расмии Ҷумҳурии Тоҷикистон, ки бо мақсади иштирок дар кори ҷаласаи 38-уми Конфронси генералии ЮНЕСКО ба шаҳри Париж ташриф оварда буд, дар Дафтари ЮНЕСКО бо мудири кулли ЮНЕСКО хонум Ирина Бокова мулоқот доир кард. 
Дар мулоқот ҷониби Тоҷикистон дар ҳайати Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Абдуҷаббор Раҳмонзода, вазири фарҳанги Тоҷикистон Шамсиддин Орумбекзода, намояндаи доимии кишвар дар назди ЮНЕСКО сафир Рустамҷон Солиев ва котиби масъули Комиссияи миллии Ҷумҳурии Тоҷикистон Сарвар Бахтӣ ширкат варзид.
Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа А. Раҳмонзода номаи табрикии Президенти Ҷумҳурии Тоҷикистон Эмомалӣ Раҳмонро ба муносибати 70-солагии ЮНЕСКО ба Ирина Бокова супорид. Ирина Бокова аз ҳамкорӣ ва таваҷҷуҳи хоси Роҳбари кишвар ба ЮНЕСКО изҳори миннатдорӣ карда, аз таассуроташ зимни вохӯрӣ бо Президенти кишвар дар Ню-Йорк ёдовар шуд. 
Дар суҳбат масъалаҳои ҳамкории ЮНЕСКО бо Тоҷикистон дар соҳаҳои илм, фарҳанг ва маориф мавриди баррасӣ қарор гирифт. Пеш аз ҳама, ҳозирин доир ба ворид намудани маҷмааи “Кохи Наврӯз” ва шаҳраки қадимаи Карон ба Феҳристи мероси моддии ҷаҳонӣ ва номгӯйҳои “Оши палов” ва “Чакан” ба Феҳристи мероси ғайримоддии фарҳангии башарият табодули назар карданд. 
Ҳамчунин ба Ирина Бокова туҳфаи хотиравӣ вобаста ба 3000-солагии Ҳисор ва 700-солагии Мир Саид Алии Ҳамадонӣ тақдим гардид. Дар навбати худ Ирина Бокова ба ҳайати расмии Ҷумҳурии Тоҷикистон Сертификат оид ба ворид шудани Боғи миллии Тоҷикистон (Кӯҳҳои Помир) ба Феҳристи мероси ҷаҳониро супорид. 
Суҳбат дар фазои дӯстона ва ҳусни тафоҳум анҷом пазируфт.