Аксари асъори миллии давлатҳои дунё нисбат ба доллари ИМА беқурб шуданд

Душанбе, 4.12.2015. (АМИТ «Ховар»).- Имрӯз зимни нишасти матбуотӣ муовини аввали раиси Бонки миллии Тоҷикистон Ҷамолиддин  Нуралиев оид ба вазъи асъори миллӣ ва хориҷӣ маълумот дода, таъкид дошт, ки тибқи  таҳлилҳои охир аз оғози сол то 4 декабри соли равон  қурби расмии сомонӣ аз 5,3074 сомонӣ то ба 6,7637 сомонӣ барои 1 доллари ИМА ё 27,4 фоиз коҳиш ёфтааст. 
Қурби нақдии (бозории) доллари ИМА аз 5,47 сомонӣ то ба 7,18 сомонӣ барои 1 доллари  нақдии ИМА ё 31,3 фоиз баланд шудааст. 
“Танҳо бо як таваҷҷуҳи рӯякӣ ва қиёс кардани рақамҳои поён метавон дарк кард, ки бо вуҷуди доштани иқтисодиёти пуриқтидор, захираҳои калони тиллоию асъорӣ ва истифодаи онҳо ҳангоми ба миён омадани фишорҳои қурбӣ, дар соли 2015 аксари асъорҳои миллии давлатҳои дунё  нисбат ба доллари ИМА беқурб шуданд. Аз ҷумла,  дар ин давра қурбҳои Евро ба андозаи 12,4%, рубли русӣ 12,7%, тангаи қазоқӣ 68,6%, соми қирғизӣ 28,8%, суми ӯзбекӣ 13,5%, рубли беларусӣ 51,5%, юани чинӣ 2,9% ва иени ҷопонӣ 3,1% коҳиш ёфтанд”,-илова намуд раиси БМТ. 
Ҷ.Нуралиев  мисол овард, ки қурби доллари  нақди ИМА нисбат ба сомонӣ аз 1 январ то 4 майи соли равон 24,6 фоиз ва аз ин сана то имрӯз ҳамагӣ 6,7 фоиз баланд шудааст. Қобили таваҷҷуҳ он аст, ки 6,1 фоизи он ба даҳаи охири моҳи ноябр рост меояд, ки ин тағйирёбии босуръат аз кӯтоҳмуҳлат ва бештар субъективию ҳаннотӣ будани тағйироти мазкур баръало шаҳодат медиҳад.