Ҷаласаи фаврӣ-хизматӣ дар назди Р. Раҳимзода

Душанбе, 02.12.2015. (АМИТ «Ховар»).- Имрӯз, 2-уми декабр дар РВКД дар шаҳри Душанбе  ҷаласаи фаврӣ-хизматӣ дар назди вазири корҳои дохилӣ Раҳимзода Рамазон Ҳамро бо иштироки сардорони раёсатҳо ва ҳайати шахсии ҷузъу томҳои мақомоти корҳои дохилӣ баргузор гардид.
Мақсади ҷаласаи васеи фаврӣ-хизматӣ мавриди иҷро қарор додани дастуру супоришҳои Президенти Ҷумҳурии Тоҷикистон Эмомалӣ Раҳмон буд, ки дар ҷаласаи Шӯрои амнияти Ҷумҳурии Тоҷикистон 23-юми ноябри соли ҷорӣ баён гардиданд.
Дар ҷараёни ҷаласа аз ҷониби вазири корҳои дохилӣ ба масъулини соҳа дастур дода шуд, ки кормандони милитсия дар якҷоягӣ бо аҳли ҷомеа корро пурзӯр намуда, дар ҳамкорӣ оид ба масъалаҳои пешгирӣ намудани шомилшавии шаҳрвандон ба ҳизбу ҳаракатҳои ғайриқонунӣ ва гурӯҳҳои ифротгаро, мубориза бар зидди ҷинояту ҷинояткорӣ фаъолият намоянд.
Ҳамчунин дар самти мубориза бар зидди ҷиноятҳои фаромиллӣ, аз қабили терроризм, экстремизм ва гардиши ғайриқонунии маводи мухаддир супоришҳои мушаххас дода шуданд.