Баҳси абёти Муҳаммад Иқболи Лоҳурӣ дар маҳфили «Оламафрӯз»

Оламафрӯз — армуғони ҳикмату шеъру сухан,
Оламафрӯз — армуғони оламорои Ватан.
Олами андешаҳову олами ангезаҳо,
Олами фазлу маонӣ, машъали сад анҷуман.

Душанбе, 18.12.2015. (АМИТ «Ховар»).-Бо чунин мисраъҳои равону зебо оғоз гардид, маҳфили адабиву фарҳангии Китобхонаи миллии Тоҷикистон бо номи “Оламафрӯз”. Он бо иштироки доираи васеи кормандони мақомоти корҳои дохилӣ доир шуда, маҳфилоро шоири шинохта Хайрандеш ва базморо овозхони ансамбли «Сипар»-и ВКД Абдулхайри Муъмин буд, ки бо таронаҳои рӯҳбахшу дилнавозаш аз ғазалҳои Муҳаммад Иқболи Лоҳурӣ хотири ҳозиринро шод гардонид.
Маҳфил хеле ҷолибу шавқовар сурат гирифта, абёти зиёди ин шоири бузурги маънисаро аз ҷониби кормандони милитсия шарҳу тафсир ёфтанд. Роҳбаладони маҳфил, аз ҷумла Исмоил Пирмуҳаммадзода ба донишу маърифат ва фарҳангу маънавиёти кормандони мақомоти корҳои дохилӣ баҳои баланд дода, иброз намуд, ки боиси хушнудӣ ва сарфарозист, ки кормандони милитсия дар баробари меҳнату машаққати шабонарӯзӣ боз вақт ва имконият пайдо менамоянд, то ки маҳфилорои сухан бошанд.
Тавре масъулин иброз намуданд, “Оламафрӯз” тибқи тарҳи пешниҳодӣ ҳар моҳ як маротиба бо ширкати ҷамъе аз дӯстдорони каломи бадеъ, устодони донишгоҳҳо, шогирдон, хонандагон ва кормандони Китобхона баргузор мешавад.