Ҳисор: Ангур фаровон мешавад

Душанбе, 16.12.2015. (АМИТ «Ховар»).- Деҳаи Тӯдаи ноҳияи Ҳисор  аз калонтарин деҳаҳо дар ҷумҳурӣ маҳсуб мешавад. Сокинони ин деҳа солҳои сол ба парвариши тут машғул буда, дар мавсими тутпаз ба сокинони ҷумҳурӣ тути ширину лазиз пешкаш менамоянд, ки  ба сиҳатии мардум аҳамияти калон дорад.  Инак чанд сол боз бо сарварии Абдурашид Раҳимов, сарвари  Ҷамъияти дорои масъулияти маҳдуди «Кишмиши Тӯда» дар масоҳати 103 гектар  токзор  бунёд ёфт, ки 71 гектарашро ангури навъи кишмиш  ташкил медиҳад.  Деҳқонон имсол ҳосили фаровони ангур парвариш намуданд. Аз ҷумла, беш аз 100 тоннаи  ин навъи ангур ба Федератсияи   Русия интиқол ёфт.  Дар  баробари фурӯхтани ангуру  тайёр кардани мавиз,  инчунин  сохтмони корхонаи коркарди ангур  низ дар нақша аст.