Кремл хулосаи ФСБ-ро оид ба ҳамлаи террористии ҳавопаймои A321 ёдовар шуд

Душанбе, 14.12.2015. (АМИТ «Ховар»). — Cухангӯи президенти Русия Дмитрий Песков, изҳороти Мисрро оид ба мавҷуд набудани далели ҳамлаи террористӣ дар ҳавопаймои «Airbus A321»-и рӯзи 31-уми октябр суқуткарда шарҳ дода, хулосаи хадамоти махсуси Русияро ёдовар шуд, иттилоъ медиҳад РИА Новости рӯзи душанбе, 14 декабр.
«Танҳо метавонам, хулосаи мутахассисони хадамоти махсусро, ки ба хулоса омаданд, ки ин ҳамлаи террористӣ буд, хотиррасон намоям», — таъкид намуд Дмитрий Песков.
Песков ҳамчунин зикр кард, ки махсусан дар ин бора сардори ФСБ Александр Бортников рӯзи 16-уми ноябр ба президент Владимир Путин маълумот дод, — хабар медиҳад «Интерфакс».
Ҷониби Русия ҳанӯз ҳисоботи пешакии Мисрро дастрас накардааст, — мегӯяд манбаъ ба «Интерфакс». Ба гуфтаи ӯ, бинобар ин то ҳол Маскав наметавонад мазмуни гузоришро арзёбӣ кунад.
Чанде пеш, вазорати ҳавоии шаҳрвандии Миср изҳор дошт, ки коршиносони мисрӣ омодасозии гузориши пешакиро оид ба суқути «Airbus A321» дар нимҷазираи Синай анҷом доданд. «Кумитаи техникӣ оид ба тафтишот ҳанӯз чизе, ки аз ҳама гуна ҳуҷуми ғайриқонунӣ ё амали террористӣ дарак медиҳад, дарёб накардааст», — изҳор дошт вазорат.