Мусобиқаи ҷумҳуриявӣ: Таваҷҷуҳ ба дзюдо меафзояд

Кӯлоб, 23.12.2015. (АМИТ «Ховар»). -Дар шаҳри Кӯлоб байни ҷавонони соли таваллуди 1996- 1998 мусобиқаи ҷумҳуриявӣ оид гӯштини навъи дзюдо баргузор гардид. Мусобиқаи мазкур се рӯз идома карда, дар он зиёда аз 160 варзишгари ҷавон аз тамоми ҷумҳурӣ ширкат варзиданд. Ба иттилои масъулини бахши ҷавонон, варзиш ва сайёҳии минтақаи Кӯлоб ҷалби зиёди варзишгарон ба ин намуди гӯштин шаҳодати он аст, ки он яке аз намудҳои варзиши олимпӣ ба ҳисоб меравад. 
Ба иттилои сардовари мусобиқа варзишгарон аз рӯи ҳашт вазн байни ҳам қувваозмоӣ намуданд. Иттилоъ дода шуд, ки ҳамаи ғолибон ва беҳтаринҳо ба дастаи мунтахаби ҷавонон оид ба гӯштини дзюдо шомил шуда, барои ширкат дар  мусобиқаҳои байналмиллалӣ омодагӣ мегиранд.