Ҷонибдории Шӯрои ҷамъиятӣ аз қабули қонун дар бораи Пешвои миллат

Душанбе, 25.12.2015. (АМИТ «Ховар»). — Имрӯз ҷаласаи ҷамъбастии Шӯрои ҷамъиятии Ҷумҳурии Тоҷикистон доир шуд, ки дар он фаъолияти Шӯро дар соли 2015 мавриди таҳлилу баррасӣ қарор гирифт. Дар қатори масоили баррасишаванда, инчунин аъзои Шӯро мавзӯи қабул гардидани Қонуни Ҷумҳурии Тоҷикистон «Дар бораи Асосгузори сулҳу Ваҳдати миллӣ-Пешвои миллат»-ро низ муҳокима намуда, онро амри зарурӣ ва саривақтӣ номиданд.
Нуралӣ Саидов, котиби ҳамоҳангсози Шӯрои ҷамъиятӣ ба АМИТ «Ховар» гуфт, ки аъзои Шӯро якдилона аз қабул гардидани  Қонуни Ҷумҳурии Тоҷикистон «Дар бораи Асосгузори сулҳу Ваҳдати миллӣ-Пешвои миллат» ҷонибдорӣ намуда, онро таърихию тақдирсоз унвон карданд. 
Аз ҷумла, зикр шуд, ки хизматҳои Президенти Тоҷикистон Эмомалӣ Раҳмон дар барқарорсозии сулҳу ваҳдати сартосарӣ, рушди тамоми соҳаҳо, муаррифии Тоҷикистон дар арсаи ҷаҳонӣ басо калон буда, арзандаи чунин унвони олист. 
Аъзои Шӯрои ҷамъиятии Ҷумҳурии Тоҷикистон аз додани унвон ба Президенти Ҷумҳурии Тоҷикистон, Раиси Шӯрои ҷамъиятии Ҷумҳурии Тоҷикистон изҳори хушнудӣ карда, ин унвони олиро ба Пешвои миллат Эмомалӣ Раҳмон ва мардуми Тоҷикистон табрик гуфтанд.