Пешгирии шомилшавии ҷавонон ба ҳизбу ҳаракатҳои ғайриқонунӣ дар Суғд

Душанбе, 16.12.2015. (АМИТ «Ховар»).-Бо мақсади пешгирии шомилшавӣ ба ҳизбу ҳаракатҳои ғайриқонунӣ ва дар ин замина баланд бардоштани дониши сиёсии ҷавонон раёсати Донишкадаи политехникии Донишгоҳи техникии Тоҷикистон ба номи академик Муҳаммад Осимӣ тасмим гирифтааст, ки дар ин самт силсилаи чорабиниҳоро доир намояд.
Чанде пеш бо ширкати кормандони Раёсати корҳои дохилии вилояти Суғд — сардори шуъбаи тафтишотӣ, Ашӯрбой Сидиқов ва Дилдор Шамсидинов ва донишҷӯёни донишкада вохӯрӣ доир гардид. 
Нахуст филми мустанад аз ҳаёти ҷангиёни Сурия нишон дода шуд, ки он аз бераҳмию даҳшатафкании гурӯҳҳои ифротӣ нақл мекард. Сипас аз ҷониби донишҷӯён вобаста ба мавзӯъ саҳначае аз рӯзгори як оилаи тоҷик нишон дода шуд.
Ашӯрбой Сидиқов дар бораи ҳизбу ҳаракатҳои ғайриқонунӣ, аз ҷумла “Салафия” маълумот дода, аз риояи танзими расму оинҳо дар тӯю маъракаҳо, истифодаи телефонҳо дар вақти дарс, бо мошин омадан ба машғулият сухан карда, ҷавононро даъват кард, ки барои баланд бардоштани маънавиёт талош варзанд.