Русия ва Фаронса оид ба мубориза бо ДОИШ табодули маълумот мекунанд

Душанбе, 25.12.2015. (АМИТ «Ховар»). — Русия ва Фаронса оид ба мубориза бо ДОИШ дар Сурия табодули маълумоти фавриро ба роҳ мемонанд, иттилоъ медиҳад «РИА Новости». Сардори Ситоди генералии Қувваҳои мусаллаҳи Федератсия Русия бо ҳамтои фаронсавиаш оид ба табодули мутақобилаи маълумоти дастрас ба мувофиқа омад. Ин ҳамкорӣ ба хотири ҳамоҳанг кардани амалиёти мубориза бо гурӯҳи террористии ба ном «Давлати исломӣ» ба роҳ монда мешавад.
«Мо ба мувофиқа омадем, ки ба хотири ҳамоҳангии амалиёт барои зарбаи самараноктар расондан ба нуқтаҳои фармондеҳӣ, техникаи ҳарбӣ, анбор, роҳҳои таъминоти ҷангиён ва дигар инфрасохторҳои ДОИШ дар Сурия табодули маълумоти фавриро ба роҳ монем», — гуфта мешавад дар иттилоияи Ситоди генералии Қувваҳои мусаллаҳи Русия.
Бино ба иттилои хадамоти матбуоти Вазорати мудофиаи Русия, ҷонибҳо роҷеъ ба вазъи Сурия табодули назар карданд. Онҳо дурнамои фаъолгардонии ҳамкориро дар мубориза бар зидди терроризми байналмилалӣ муайян карданд. Таъсиси гурӯҳи кории коршиносони ҳарбии ситодҳои генералӣ дар назар аст.