Суғд: Хушкмеваи вилоят ба 12 минтақаи Русия ва давлатҳои ҳамсоя содирот мешавад

Душанбе, 8.12.2015. (АМИТ «Ховар»).-Дар нӯҳ моҳи соли равон аз вилояти Суғд 49 ҳазору 204 тонна хушкмева содирот шуд, ки арзиши гумрукии он зиёда аз 10 млн. доллари ИМА -ро ташкил дод. 
Ба иттилои Шарифулло Абдуллоев, сардори Раёсати минтақавии рушди иқтисод ва савдои мақомоти иҷроияи ҳокимияти давлатии вилояти Суғд имрӯз соҳибкорони вилоят бо якчанд минтақаи Русия шартномаи дутарафа оид ба содироти маҳсулоти кишоварзӣ дошта, ҳоло  хушкмеваи Суғд дар 12 минтақаи Русия ва давлатҳои ҳамсоя, чун Қазоқистону Қирғизистон ва Чин ҷойгоҳи худро пайдо намудаву содирот мешавад.
Ҳамзамон соли равон дар қатори чанд намуди тармеваву хушкмеваи содиротӣ, соҳибкорони вилоят дар бозори давлатии Чин гелоси Суғдро муаррифӣ намуданд, ки он низ ҳоло харидори худро пайдо кардааст. Дар ин замина, соҳибкорони шаҳри Исфара маҳсулоти хушкмеваи худро то мамлакатҳои Аврупо, чун Олмон, Полша ва Чехия интиқол дода истодаанд, ки ин далели серхаридор будани маҳсулоти кишоварзии Тоҷикистон дар мамолики хориҷӣ мебошад.