Сурия созишномаи бидуни раводидро бо Туркия бекор кард

Душанбе, 18.12.2015 (АМИТ «Ховар»).- Агентии расмии иттилоотии Сурия «SANA» бо ишора ба изҳороти ВКХ-и ин кишвар иттилоъ дод, ки рӯзи панҷшанбе Димишқ тасмим гирифт,  созишномаи низоми бидуни раводидро бо Туркия бекор кунад.
Дар изҳорот гуфта мешавад, ки қарори мазкур вокуниш ба амали Туркия, ки 9-уми декабр ба тариқи яктарафа созишномаи низоми бидуни раводидро бо Сурия бекор карда буд, мебошад. Дар он таъкид мешавад, ки ин қарори Сурия ба ҳифзи соҳибихтиёрии давлат нигаронида шуда, ба талаботи принсипи баробарҳуқуқӣ ҷавобгӯ мебошад. Минбаъд шаҳрвандони Туркия ба Сурия бе раводид омада наметавонанд. Дар  санад ҳамчунин гуфта мешавад, ки ҳукумати Туркия масъулияти пурраи оқибатҳои қарори бекор кардани созишномаи мазкурро ба зимма дорад.