Ярмаркаи маҳсулоти гуногун дар арафаи Соли нави мелодӣ

Душанбе, 29.12.2015. (АМИТ «Ховар»). — Дар арафаи Соли Нави мелодӣ бо ташаббуси роҳбарияти Вазорати корҳои дохилӣ дар шафати бинои вазорат ярмаркаи фурӯши маҳсулоти ниёзи мардум ташкил шуд, ки дар он ҳайати шахсии Вазорати корҳои дохилӣ ва дигар мақомоти ҳифзи ҳуқуқ иштирок доштанд.
Дар ярмаркаи мазкур маҳсулоти хӯрокворӣ аз хоҷагиҳои ёрирасони Вазорати корҳои дохилӣ, хоҷагиҳои деҳқонии шаҳру ноҳияҳои вилояти Хатлон, минтақа ва ноҳияи Рашт, ноҳияҳои тобеи маркази ҷумҳурӣ пешкаши харидорон гардиданд. Нархи маҳсулоти ниёзи мардум, аз қабили орду равған, биринҷ, нахӯд, гӯшту тухм, шакар, сабзавот дар муқоиса бо нархи бозор нисбатан арзонтар буданд. Барои мисол, 1 кило орд — 2,4 сомонӣ, равған 6 сомонӣ, нархи 1 кило пиёзу сабзӣ ва картошка — 1 сомонӣ, шалғам — 50 дирам, 1 кило гӯшт — 20 сомонӣ,  биринҷ — 5 сомонӣ, як қуттӣ тухм — 15 сомонӣ, 1 килограмм себу нок бо нархи аз 2 то 3 сомонӣ ба фурӯш гузошта шуда буданд.