Агентии хизмати давлатӣ: 271 нафар ба мансаби ишғолнамуда номувофиқ баҳогузорӣ шуд

Душанбе, 12.01.2016. (АМИТ «Ховар»). — Дар соли 2015 кормандони Агентии хизмати давлатӣ дар 95 ҷаласаи комиссияҳои аттестатсионии мақомоти давлатӣ иштирок карданд. Ин нуктаро имрӯз, 12 январ зимни нишасти матбуотӣ директори Агентии хизмати давлатии назди Президенти ҶТ Ҷумъа Давлатов ироа намуд.
Тибқи хулосаҳои комиссияҳои аттестатсионӣ аз 2 ҳазору 479 хизматчии давлатии ба аттестатсия фарогирифташуда 2 ҳазору 208 (занон- 454) (2014 — 889, занон — 203) нафар ба мансаби ишғолнамуда мувофиқ баҳогузорӣ шуданд. Аз ин шумора 32 (занон — 6) (2014 — 47) нафар барои ба мансаби баландтар таъйин намуданд, 72 (занон — 12) (2014 — 35) нафар барои дохил кардан ба захираи кадрҳои роҳбарикунандаи хизмати давлатӣ, 67 (занон — 17) нафар барои пеш аз муҳлат додани рутбаи тахассусии навбатӣ тавсия шуданд.
“Дар як вақт тибқи хулосаҳои комиссияҳои аттестатсионӣ 271 (занон — 14) нафар ба мансаби ишғолнамуда номувофиқ баҳогузорӣ шуданд. Аз ин шумора ба 250 (занон — 14) нафар барои такмили ихтисос ва ба 18 нафар гузаронидан ба мансаби пасттар ва ба 3 нафар аз мансаб озод кардан тавсия дода шуд”,-гуфт директори агентӣ.