Бунёди 15 муассисаи таҳсилоти ҳамагонӣ дар Кӯлоб

Кӯлоб, 20.01.2016. (АМИТ «Ховар»)- Дар минтақаи Кӯлоб сохтмони 15 муассисаи таҳсилоти ҳамагонӣ ҷараён дорад. Дар деҳаи Давлатободи ноҳияи Кӯлоб бинои муассисаи таҳсилоти миёнаи умумии № 23 дар ҳолати садамавӣ қарор дошта, мушкилоти ҷои нишаст низ ба назар мерасад. Корҳои сохтмонии бинои нав оғоз гардидаанд, ки дар оянда тамоми норасиҳои ҷойдошта бартараф хоҳанд гардид ва ҷараёни таълиму тарбия дар сатҳи лозимӣ идома хоҳад ёфт. Тавре ки муҳандиси корҳои сохтмонӣ Сайдализода Бахтовар гуфт, корҳои тахту ҳамворкунӣ аз моҳи ноябри соли 2015 оғоз гардидаанд. Аз рӯи лоиҳаи тасдиқгардида бинои муассиса дуошёна буда, дар он 16 синфхона, утоқҳои фаннӣ ва роҳбарият ҷой дода шудаанд.