Дар ҷумҳурӣ 61 муассисаи томактабии хусусӣ фаъол аст

Душанбе, 11.01.2016. (АМИТ «Ховар»). — Дар ҷумҳурӣ 61 муассисаи томактабии хусусӣ фаъолият менамояд, аз ҷумла, дар вилояти Хатлон 4 муассиса, дар вилояти Суғд — 27 муассиса, ноҳияҳои тобеи ҷумҳурӣ -8 ва дар шаҳри Душанбе 22 муассиса. Ин нуктаро имрӯз, 11 январ зимни нишасти матбуотӣ вазири маориф ва илми ҷумҳурӣ Нуриддини Саид таъкид намуд.
Бино ба иттилои вазир, дар соли 2015 дар вилояти Суғд 5 адад, дар ноҳияҳои тобеи ҷумҳурӣ — 4 ва шаҳри Душанбе 6 муассисаи таълимии хусусӣ мавриди истифода қарор дода шудааст.
«Соли таҳсили сипаригардида зинаи таҳсилоти миёнаи умумиро 111620 нафар хатм намуда, 73700 нафар аз қайди Маркази миллии тестӣ гузашта, 39672 нафар ба муассисаҳои таҳсилоти олии касбӣ дохил гардиданд”,-илова намуд Нуриддини Саид.
Соли таҳсили гузашта зинаи таҳсилоти умумии асосиро 167 603 нафар хатм намуда, ба зинаи сеюми таҳсилот 123 009 нафар барои идомаи таҳсил қабул шуданд, ки 73,3 % ташкил медиҳад. Агарчанде 8388 нафар таҳсили худро дар муассисаҳои таҳсилоти ибтидоии касбӣ ва 3676 нафар дар муассисаҳои таҳсилоти миёнаи касбӣ идома додаанд, вале 31922 нафар бо сабабҳои гуногун таҳсил намекунанд.