Фаъолияти назарраси «Амонатбонк» дар ноҳияи Файзобод

Файзобод, 20.01.2016. (АМИТ «Ховар») .-Филиали «Амонатбонк»-и ноҳияи Файзобод аз рӯйи хизматрасониҳои интиқоли маблағҳо, пардохти сари вақтии нафақа, қабули пасандозҳо, пешниҳоди қарзҳо ва дигар хизматрасониҳои бонкӣ дар сатҳи баланд барои мизоҷон дастрас мебошад. Муштариёни асосии бонки мазкур 6700 нафар нафақахӯр ва 3703 корманди соҳаҳои буҷетӣ мебошанд, ки сари вақт аз тариқи терминалҳо маошу нафақаашонро дастрас мекунанд. Бонки мазкур дорои 6 маркази хизматрасонӣ, як қисми амалиётӣ, як дастгоҳи банкомат ва 8 дастгоҳи постерминалҳо мебошад ва дар соли 2015 нафақахӯрон ва кормандони соҳаҳои буҷетиро пурра бо кортҳои пластикӣ таъмин кардаанд.

«Амонатбонк»-и ноҳияи Файзобод барои дастгирии бахшҳои иқтисодиёти ноҳия, бахусус рушди соҳаи кишоварзӣ ва мусоидат ба соҳибкории хурду миёна ба зиёда аз 500 нафар хоҳишмандон дар соли 2015, беш аз 3 миллион сомонӣ маблағҳо пешниҳод кардааст, ки наздики 500 ҳазор сомонияшро қарзҳои имтиёзнок ташкил мекунанд.