Фаъолияти соли 2015-и Кумитаи ҳифзи муҳити зист натиҷагирӣ шуд

Душанбе, 09.01.2016. (АМИТ «Ховар»). — 8-уми январи соли равон ҷаласаи мушовара оид ба натиҷагирӣ аз фаъолияти соли 2015-и Кумитаи ҳифзи муҳити зисти назди Ҳукумати Ҷумҳурии Тоҷикистон ва вазифаҳои навбатӣ барои соли 2016 доир шуд. Дар ҷаласа масъалаҳои муҳокимашаванда мувофиқи муқаррароти ҷорӣ пешниҳод гардиданд.
Дар ҷаласа 3 масъала мавриди баррасӣ қарор дода шуд. Аз рӯи масъалаи якум раиси кумита Х. Ибодзода маърӯза намуда, фаъолияти кумита ва камбудиҳои ҷойдоштаи соҳавиро дар қаламрави ҷумҳурӣ мавриди таҳлил ва баррасии амиқ қарор дод. Доир ба масъалаи дуюми ҷаласаи мушовара муовини раиси кумита Шамс Назаров сухан гуфта, намояндагони вазорату идораҳои мазкурро даъват намуд, ки дар ҳалли мушкилоти ҷойдошта тадбирҳои зарурӣ андешида, авлавиятҳои ҳифзи муҳити зистро дар мадди назар қарор диҳанд.
Ҳамчунин дар ин масъала намояндагон аз Прокуратураи генералӣ, Вазорати саноат ва технологияҳои нав, Саридораи назорати давлатии бехатарии корҳо дар саноат ва соҳаи кӯҳкорӣ, КВД «Хоҷагии манзилию коммуналӣ», Агентии беҳдошти замин ва обёрӣ ва Вазорати энергетика ва захираҳои оби ҷумҳурӣ дар ҷаласа ширкат намуда, андешаҳои худро дар бораи ҳамкории муштарак барои иҷрои дастуру супоришҳои ҳукумат ва дигар масъалаҳои ҳалталаб баён доштанд.