Хуҷанд: 483 хоҷагии калонҳаҷм мавриди азнавташкилдиҳӣ қарор гирифт

Хуҷанд, 15.01.2016. (АМИТ «Ховар»).- Дирӯз раиси вилояти Суғд Абдураҳмон Қодирӣ дар бинои Кохи матбуоти шаҳри Хуҷанд барои хабарнигорон нишасти матбуотӣ доир намуд, ки дар он беш аз 60 намояндаи васоити ахбори омма иштирок намуд.
Дар ҷараёни нишасти матбуотӣ роҳбари вилоят оид ба натиҷаҳои фаъолияти соҳаҳои гуногуни иқтисодиёти вилоят дар давоми соли 2015 ба ҳозирин гузориш дод.
Аз ҷумла, Абдураҳмон Қодирӣ гуфт, ки соли 2015 соли амалишавии чанд барнома, алалхусус дар самти ислоҳоти кишоварзӣ, эҳёи ҳунарҳои мардумӣ, ободонии роҳҳо ва оғози сохтмони чанд шаҳрак буд.
Бояд гуфт, ки мутобиқ ба амалишавии таҷдиди хоҷагиҳои калонҳаҷм, ки он соли 2014 оғоз ёфт, соли 2015 низ ин ислоҳот идома ёфта, 483 хоҷагии калонҳаҷм мавриди азнавташкилдиҳӣ қарор дода шуда, аз ин ҳисоб 5,5 ҳазор хоҷагии деҳқонию инфиродӣ таъсис дода шуд, ки дар маҷмӯъ, ҳоло шумораи умумии онҳо ба 62 ҳазор баробар гардидааст.