Қайроққум: Вохӯрии намояндагони муассисаҳои таҳсилоти олӣ бо хатмкунандагон

Қайроққум, 10.02.2016 (АМИТ «Ховар»).- Дар Қасри фарҳанги шаҳри Қайроққум мулоқоти озоду шаффофи намояндагони муассисаҳои таҳсилоти олии вилояти Суғд бо хатмкунандагони ин шаҳри саноатӣ баргузор шуд.
Муовини сардори Раёсати маорифи вилоят Сайфулло Раҳматов гуфт, ки аз соли 2001 ин ҷониб бо дастгирии Асосгузори сулҳу Ваҳдати миллӣ, Пешвои миллат муҳтарам Эмомалӣ Раҳмон бо мақсади ҷалби ҷавонони навоҳии дурдаст ба мактабҳои олӣ квотаи президентӣ роҳандозӣ шуда, садҳо нафар тавассути ин иқдом соҳибкасб гардиданд.
Сармутахассиси шуъбаи рушди иҷтимоӣ ва робита бо ташкилоти ҷамъиятӣ Мирзотоҳир Набиев ҷалби хатмкунандагони шаҳрро ба мактабҳои олии кишвар хуб арзёбӣ намуда, аз ҷумла иброз дошт, ки дар соли хониши 2015 аз 520 хатмкунандаи шаҳр 201 нафар аз тариқи Маркази миллии тестӣ ба мактабҳои олӣ дохил шуданд, ки ин нишондиҳанда қаноатмандкунанда аст. Аммо бо вуҷуди ин ҳанӯз довталабоне ҳастанд, ки дар интихоби касб мушкилӣ мекашанд ва чорабинии имрӯза имкон медиҳад, то довталаб роҳи дурустро интихоб кунад.