Ҳамадонӣ: 1млн. 810 ҳазор сомонӣ барои таъмири муассисаҳои таълимӣ

Ҳамадонӣ, 01.02.2016 (АМИТ«Ховар»).- Вализода Абдуқодир, раиси ноҳияи Ҳамадонӣ зимни нишасти матбуотӣ ба хабарнигорон иттилоъ дод, ки  бо мақсади беҳтар кардани шароити  мактабҳо  ва дар ин замина баланд бардоштани  сифати таълиму тарбия  аз ҳисоби буҷети ноҳия 1млн. 810 ҳазор сомонӣ барои  таъмири муассисаҳои таълимӣ ҷудо   шудааст.

Дар ин давра сохтмони 10 синфхонаи иловагӣ  ва бинои нави  шуъбаи маорифи ноҳия  ба анҷом расида, барои  истифода пурра  омода гардонида шуд. Ҳоло  сохтмони муассисаи таълимии №43, бинои муассисаи нотамом  дар деҳаи Пушкин  барои 624 хонанда, 6 синфхона  дар назди муассисаи таҳсилоти ибтидоии №39  ва сохтмони дигар муассисаҳои таълимӣ бо суръат идома дорад.