Дар Чин ҳолати аввалини сироятшавӣ аз вируси Зика ба қайд гирифта шуд

Душанбе, 10.02.2016. (АМИТ «Ховар»). — Дар ин бора агентии «Синхуа» бо ишора ба Кумитаи давлатии кор бо тандурустӣ ва танзими оила дар Чин хабар дод.
Бино ба иттилои манбаъ, рӯзи 9-уми феврал кумитаи номбурда маълумот дар бораи ҳолати аввалини сироятшавии вируси Зикаро тасдиқ кардааст.
Ҳоло ҳолати бемор, ки сокини 34-солаи шаҳристони Гансяни музофоти Тсзянсии Чин мебошад, беҳтар гардида, ҳарорати муътадил дорад ва доначаҳои бадани ӯ нест шуда истодаанд.
28-уми январ зимни сафар ба Венесуэла таби бадани мард баланд шуда, дар ӯ дард ва чархзании сараш пайдо шуданд. 5-уми феврал ӯ тавассути Сянган ва Шэнчжэн ба зодгоҳи худ баргаштааст.
Аз 6-уми феврал ин ҷониб бемор дар зери назорат буда, дар бемористони Гансян табобат гирифта истодааст.