Фаронса ба сулҳи Сурия умед дорад

Душанбе, 23.02.2016. (АМИТ «Ховар»). Вазири корҳои хориҷии Фаронса Жан-Марк Эйро вобаста ба эълон шудани оташбас дар кишвари Сурия изҳор кард, ки Фаронса бо таваҷҷуҳи хос ба амалишавии эълони оташбас, ки бояд 27-уми феврал оғоз гардад, назар дорад.
«Ҳоло мо ҷузъиёти созишномаро мавриди омӯзиш қарор додаем. Зарур аст, ки созишномаи мазкур ҳарчӣ зудтар амалӣ карда шавад. Мо назорат мекунем, ки бандҳои созишнома аз тарафи ҳарду ҷониб ҳатман ва пурра риоя ва амалӣ гардад», — гуфтааст вазири корҳои хориҷии Фаронса.
Хотиррасон бояд шуд, ки Департаменти давлатии ИМА дирӯз изҳороти якҷояи Иёлоти муттаҳидаи Амрико ва Федератсияи Русияро пахш кард, ки тибқи он аз 27-уми феврал оташбас дар ҳудуди Сурия ҷорӣ мегардад.
Мувофиқи созишнома неруҳои ҳарбии давлатии Сурия ва шарикони он, аз ҷумла неруҳои ҳарбӣ-кайҳонии Русия ва неруҳои эътилофи байналмилалӣ таҳти роҳбарии ИМА дар давраи оташбас ҳамла ба мавқеъҳои дастаҳои ҷангии созмонҳои террористии ДИИШ ва «Ҷабҳат-ан-нусра»-ро идома медиҳанд. Яъне, созишнома дар бораи эълони оташбас нисбат ба гурӯҳу созмонҳое, ки ҷомеаи ҷаҳонӣ онҳоро ҳамчун гурӯҳҳои террористӣ шинохтааст, татбиқ намешавад.