Хатлон: Ниҳолпарварон қадрдонӣ гардиданд

Душанбе, 10.02.2016. (АМИТ «Ховар»).- Чанд рӯз пеш дар бозори “Ҳоҷӣ Шариф”-и шаҳри Қурғонтеппа ярмарка-фурӯши ниҳолҳо, гулу гулбутта, тухмии гулҳо ва зироати кишоварзӣ баргузор гардид, ки дар он хоҷагиҳои ниҳолпарварии ҷамъиятӣ ва шахсони алоҳида, фурӯшандагони тухмии гулҳо ва зироати кишоварзӣ бо шиору навиштаҷот аз шаҳру ноҳияҳои маркази вилоят иштирок доштанд. Дар ярмарка-фурӯш зиёда аз 72 ҳазор бех ниҳолҳои гуногуни мевадиҳанда, ороишию сояафкан пешкаш гардида, инчунин масъулини соҳа оид ба тарзу усули истифода бурдани заҳрхимикатҳо ҳангоми парвариши гулу гулбутта ва зироати кишоварзӣ ба харидорон маслиҳатҳои муфид доданд. Раиси вилояти Хатлон Давлатшоҳ Гулмаҳмадзода аз ин чорабинии бошукӯҳ дидан намуда, бо деҳқонону ниҳолпарварон ҳамсуҳбат шуда, ба онҳо барои боз ҳам беҳтар парвариш намудани ниҳол ва гулу гулбуттаҳо маслиҳатҳои муфид дод. Дар ҷамъбасти чорабинӣ аз тарафи раиси кумитаи тадорукот-муовини якуми раиси вилоят Ҳакимзода Қурбон барои иштироки фаъолона ҷои якум ба намояндагони шаҳри Қурғонтеппа, ҷои дуюм ба ноҳияи Бохтар, ҷои сеюм ба ноҳияи Ёвон сазовор дониста шуда, бо Сипосномаи раиси вилояти Хатлон қадрдонӣ гардиданд.
Инчунин аз тарафи Раёсати ҳифзи муҳити зисти вилоят низ барои иштироки фаъолона ба як зумра шахсони алоҳида ва муассисаҳои таълимӣ, ки самаранок ба парвариши ниҳол ва гулу гулбутта машғуланд, ифтихорномаю туҳфаҳои хотиравӣ супурда шуданд.