Қирғизистон: Ба Паёми Раиси тоҷикони дунё таваҷҷуҳи хосса зоҳир шуд

Душанбе, 10.02.2016. (АМИТ «Ховар»). — Дар Қирғизистон беш аз 55 ҳазор ҳамзабононамон кору зиндагӣ мекунанд ва онҳо ҳамвора аз равандҳои рӯйдода дар Тоҷикистон воқиф мебошанд.
Тоҷикони минтақаҳои ҷанубии Қирғизистон бо истифода аз дастгоҳҳои моҳвора, суханронии Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро ба таври мустақим тамошо намуданд.
Тоҷикони муқими Қирғизистон дар мавриди Паём изҳор намуданд, ки ин суханронии Пешвои миллат вазъи кунунии ҷомеаи Тоҷикистонро мавриди таҳлили амиқ гирифта, самтҳои асосии сиёсати дохилию хориҷии давлатро барои соли 2016 ва давраи миёнамуҳлати оянда муайян месозад.
Ба ақидаи академики Академияи илмҳои Қирғизистон, раиси ифтихории Созмони тоҷикони ба номи А. Рӯдакӣ Абдуҳалим Раҳимҷонов рушду суботи Тоҷикистон ва пешрафти иқтисодии он барои ҳамзабонони бурунмарзӣ аҳамияти хосса дорад, зеро дар ин ҳолат обрӯ ва мақоми тоҷикон дар кишвари иқомат баланд мегардад.
Муовини раиси Иттиҳодияи ҷамъиятии тоҷикон ва сармуҳаррири нашрияи тоҷикии «Паёми Ала-Тоо» Қодиршои Мурувват изҳор дошт, ки муҳтаво ва мазмуни Паёми навбатии Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷавобгӯи авзои баамаломада дар арсаи байналмилалӣ ва минтақаи Осиёи Марказӣ мебошад. Аз ин хотир таҳияи барномаи муқобила бо падидаҳои терроризм ва тундгароӣ, барои ҳифзи оромии мамлакат ва дар кулл ҳамаи ҷумҳуриҳои минтақа муҳим мебошад.
Додоқузӣ Қузиев- раиси маркази фарҳангии тоҷикони шаҳраки санъатии Ҳайдаркони вилояти Ботканд, ки он ҷо 5 ҳазор ҳамзабононамон зиндагӣ менамоянд ва мактаби тоҷикии ба номи Абулқосим Фирдавсӣ амал мекунад, изҳор дошт, ки бо иштироки омӯзгорону хонандагони синфҳои болоӣ тамошои дастаҷамъии Паём сурат гирифт. Тоҷикони шаҳраки Ҳайдаркон аз мусоидати мардуми шарифи тоҷик, Ҳукумати Тоҷикистон, шахсан Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар мавриди фиристодани фарзандонашон ба донишгоҳу омӯзишгоҳҳои Душанбе ва Хуҷанд изҳори сипос намуданд.
Мавлонҷон Абдураззоқов, тоҷири шинохта ва раиси маркази фарҳангии тоҷикони деҳшӯрои Учқурғони ноҳияи Қадамҷо изҳор дошт, ки новобаста аз бӯҳрони молии ҷаҳонӣ дар соли 2015, роҳбарияти Тоҷикистон бо истифода аз неруву захираҳои дохилӣ тавонист таъсири номатлуби онро камтар намояд. Албатта, дар ин кор саҳми Пешвои миллат арзанда мебошад ва итминону бовар ба ояндаи равшану хубтар ҳамзабонони хориҷбударо низ руҳу неру мебахшад.
Ба ҳамин тариқ, дар дигар маҳаллаҳои тоҷикнишини Қирғизистон- шаҳри Ҷалолобод, деҳаи Правдаи ноҳияи Қаросуи вилояти Уш, деҳаи Андарак, ноҳияи Лайлаки вилояти Ботканд ҳамзабонон ба мавзӯи Паёми солонаи Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Раиси тоҷикони дунё таваҷҷуҳи хосса зоҳир намуданд.