Кадом ширкатҳои мобилӣ дар бозор мавқеи ҳукмфармоӣ доранд?

Душанбе, 19.02.2016.(АМИТ «Ховар»).-Ширкатҳои мобилии «Вавилон Мобайл», «ТК Мобайл», «Индиго Тоҷикистон», «Вавилон- Т», «ТТ- Мобайл» ва «Таком» аз операторони алоқаи барқие маҳсуб мешаванд, ки дар бозори моли муайян мавқеи ҳукмфармоиро доро мебошанд. Тибқи иттилои Хадамоти зиддинҳисории назди Ҳукумати ҷумҳурӣ ин ширкатҳо тибқи муқаррароти Қонуни Ҷумҳурии Тоҷикистон «Дар бораи рақобат ва маҳдудкунии фаъолияти инҳисорӣ дар бозорҳои мол» ба Феҳристи субъектҳои хоҷагидоре, ки дар бозори моли муайян мавқеи ҳукмфармоиро доранд, дохил карда шудаанд.
Инчунин омӯзиши фаъолияти субъектҳои хоҷагидори бозори алоқаи мобилӣ аз рӯи хизматрасонии алоқаи мобилии GSM 900/1800, далели он аст, ки бозори молӣ рақобатпазир буда, ҳиссаи ширкатҳои мобилии «Индиго Тоҷикистон» аз рӯи муштариёни фаъол 31,1 %, «ТТ-Мобайл» 26,3, «Вавилон М» 24,7 %, «Таком» беш аз 17 % ва «ТК Мобайл» 2 %-ро ташкил медиҳад. Ҳамзамон дар самти хизматрасонии интернетии мобилии GSM 900/1800 саҳми операторони алоқаи мобилии «Индиго Тоҷикистон» аз рӯи муштариёни фаъол ҳудуди 40%, «Вавилон Мобайл» беш аз 31 %, «ТТ Мобайл» зиёда аз 15%, «Таком» беш аз 13% ва «ТК Мобайл» 2% -ро ташкил медиҳад.