Огоҳ намудани насли наврас аз хатару таҳдидҳои замони муосир

Душанбе, 26.02.2016. (АМИТ «Ховар»). Дирӯз як зумра ҷавонони гурӯҳи «Пешоҳанг» дар якҷоягӣ бо кормандони Хадамоти пешгирии ҳуқуқвайронкунӣ дар байни ҷавонону ноболиғони Вазорати корҳои дохилӣ, бо мактаббачагони муассисаҳои таҳсилоти миёнаи умумии №16, 20, 23, 41, 79 ва 36-и ноҳияи Шоҳмансури пойтахт вохӯрӣ намуданд.
Дар вохӯрӣ кормандони милитсия ва аъзои фаъоли гурӯҳи «Пешоҳанг»: Марҷона Тошова, Муҳсин Муродзода, Гулизор Пирова ва Рамзёр Раҳмонов доир ба масъалаҳои мубрами рӯз гуфтанд, ки ҳар як фарди ҷомеа бояд Паёми Асосгузори сулҳу Ваҳдати миллӣ, Пешвои миллат, Президенти ҶТ муҳтарам Эмомалӣ Раҳмонро сармашқи кори худ карда, дар ободонию осоиштагии кишвари азизамон саҳми арзанда гузорад.
Мактаббачагон бояд ба омӯхтани илму ҳунар, забонҳои хориҷӣ ва технологияи замони муосир машғул шуда, аз ҳар гуна кирдору амали ношоиста дурӣ ҷӯянд, то дар оянда ҳамчун шахси донишманду бофарҳанг ба воя расида, Ватани худро ободу зебо гардонанд.
Дар ҷараёни вохӯрӣ вазъи имрӯзаи ҷаҳон ва пешгирии шомилшавии ҷавонону наврасон ба ҳар гуна ҳизбу ҳаракатҳои ифротгарою тундгаро мавриди муҳокима қарор гирифта, иштирокдорони вохӯрӣ андешаҳои худро доир ба ин мавзӯъ иброз намуданд.