Омӯзиши ройгон барои шаҳрвандони Тоҷикистон дар Донишгоҳи дӯстии халқҳои Русия

Душанбе, 02.02.2016 (АМИТ «Ховар»). — Роҳбари намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар Федератсияи Русия Зоҳир Мирзозода бо муовини ректор оид ба таҳсилоти иловагии Донишгоҳи дӯстии халқҳои Русия Анжела Должикова гуфтушунид кард.
Бино ба маълумоти намояндагӣ, ҷонибҳо роҳҳои имконпазири ташкили низоми омӯзишии шаҳрвандони Ҷумҳурии Тоҷикистонро, ки хоҳиши супоридани имтиҳони умумӣ, омода намудани мутахассисон ва созмон додани марказҳо оид ба имтиҳонҳои умумиро дар Тоҷикистон доранд, баррасӣ карданд.
Мувофиқи қонунгузории федералӣ аз соли 2015 шаҳодатнома барои донистани забони русӣ, асосҳои қонун ва таърихи Русия ҳуҷҷати ҳатмӣ барои гирифтани дафтарчаи меҳнатӣ маҳсуб мешавад.
Мутаассифона, ҳолатҳое мешаванд, ки миёнаравони беинсоф бо роҳи фиреб ба муҳоҷирони зудбовар шаҳодатномаҳои қалбакӣ медиҳанд, ки дар натиҷа ин шаҳрвандон дафтарчаи меҳнатӣ гирифта наметавонанд.
Бо мақсади муайян ва пешгирӣ намудани чунин ҳаводис А. Должикова омодагиашро барои дастрас намудани маълумот нисбат ба шаҳодатномаҳои аслӣ иброз дошт. Ҳамчунин ҷонибҳо оид ба ҷалби шаҳрвандони Тоҷикистон барои омӯзиши забони русӣ ва мутобиқшавии иҷтимоӣ-фарҳангӣ дар марказҳои омӯзишии Донишгоҳи дӯстии халқҳои Русия ба таври ройгон ба тавофуқ расиданд.