Семинари омӯзишӣ барои кормандони нуқтаҳои бақайдгирии ММТ

Душанбе, 08.02.2016. (АМИТ «Ховар»). — Мувофиқи нақшаи чорабиниҳо оид ба гузаронидани имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон дар соли таҳсили 2016-2017 аз 8-ум то 23-юми феврали соли равон семинари омӯзишӣ барои кормандони нуқтаҳои бақайдгири Маркази миллии тестӣ баргузор мегардад. Барои иштирок дар семинари мазкур ва ҷалб гардидан ба кори муваққатӣ дар давраи бақайдгирӣ 237 нафар аз шаҳру ноҳияҳои ҷумҳурӣ ҳуҷҷат пешниҳод кардаанд, ки аз ин шумора 224 нафар ба иштирок дар ин семинар роҳ ёфтанд. Хотиррасон менамоем, ки семинар дар 5 минтақаи ҷумҳурӣ — шаҳрҳои Душанбе, Қурғонтеппа, Кӯлоб, Хуҷанд ва Хоруғ доир мегардад.
Мақсади чорабинии мазкур омӯзонидан ва интихоб кардани роҳбарон, ёварони роҳбарон ва бақайдгирандагони нуқтаҳои бақайдгирӣ ва дар сатҳи зарурӣ ба роҳ мондани раванди бақайдгирии довталабон барои иштирок дар имтиҳонҳои марказонидаи дохилшавӣ — 2016 аст.
Бояд зикр кард, ки семинари омӯзишии кормандони нуқтаҳои бақайдгирӣ тибқи барнома ва модули тасдиқгардида баргузор гашта, дар асоси озмуни марказ беҳтаринҳо интихоб ва ба кори муваққатӣ ҷалб мешаванд.
Фаъолияти бақайдгирандагон аз 1-уми марти соли равон шурӯъ мегардад.