Шарҳи Паём аз ҷониби Шукурҷон Зуҳуров дар Ҷиргатол

Душанбе, 22.02.2016. (АМИТ Ховар). -Имрӯзҳо ҷиҳати ташреҳи Паёми Президенти Ҷумҳурии Тоҷикистон, Ҷаноби Олӣ, мӯҳтарам Эмомалӣ Раҳмон ба Маҷлиси Олии Ҷумҳурии Тоҷикистон ва аҳамияту зарурати тағйиру иловаҳои ба Конститутсияи Ҷумҳурии Тоҷикистон пешниҳодгашта дар тамоми шаҳру навоҳии кишвар мулоқоти гурӯҳҳои корӣ ба сокинон бомаром идома дорад.
Дар мулоқоте, ки 21 феврали соли равон дар бинои мақомоти иҷроияи ҳокимияти давлатии ноҳияи Ҷиргатол баргузор гардид, Шукурҷон Зуҳуров, раиси Маҷлиси намояндагони Маҷлиси Олии кишвар нуктаҳои Паёми навбатии Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмонро шарҳ дода, дар мавриди се самти асосии стратегияи миллӣ- таъмини истиқлолияти энергетикӣ, баромадан аз бунбасти коммуникатсионӣ, таъмини амнияти озуқаворӣ сухан ронд. Мавсуф афзуд, ки дар амал татбиқ гардидани се ҳадафи миллӣ имкон фароҳам меорад, то зиндагии мардум ва вазъи иқтисодии кишвар беҳтару хубтар шавад. Ноҳияи Ҷиргатол, ки дар парвариши картошка яке аз соҳаҳои сердаромад ба ҳисоб меравад, дар мавриди босамар истифода бурдани заминҳо деҳқонони ин навоҳӣ метавонанд, ҳосили дилхоҳ ба даст оварда, содироти онро берун аз кишвар хубтар ба роҳ монанд, иброз намуд Шукурҷон Зуҳуров.
Раиси Маҷлиси намояндагони Маҷлиси Олӣ дар мулоқот ҳамчунин тағйиру иловаҳои воридшаванда ба Конститутсияи Ҷумҳурии Тоҷикистонро шарҳу тавзеҳ дода, аз ҷумла зикр намуд, ки тағйиру иловаҳои пешбинигашта ба таҳкими равандҳои демократикунонӣ, низоми мақомоти ҳокимияти давлатӣ ва риояи ҳуқуқу озодиҳои инсон ва дар маҷмӯъ ба рушди ҷомеа нигаронида шудаанд.