Соли 2015 даромади Хадамоти алоқа 2 млрд. 716 млн сомониро ташкил намуд

Душанбе, 05.02.2016 (АМИТ «Ховар»).-«Даромади умумии корхонаҳои Хадамоти алоқаи назди Ҳукумати Ҷумҳурии Тоҷикистон дар якҷоягӣ бо операторон ва провайдерон мувофиқи ҳисоботи пешакӣ дар соли 2015 ба маблағи 2 миллиарду 716 млн. сомонӣ расонида шудааст, ки ин нишондод нисбат ба ҳамин давраи соли 2014, 38 миллион сомонӣ ё ин ки 1,3 % фоиз зиёд аст». Ин нуктаро имрӯз зимни нишасти матбуотии ин ниҳод Татяна Холмуродова, муовини сардори хадамот ироа кард.
Ҳамчунин гуфта шуд, ки ҳаҷми хизматрасонии алоқа ба аҳолӣ 1 миллиарду 535 млн. сомониро дар бар мегирад. Хизматрасонии алоқа ба шахсони имтиёздор аз тарафи Оператори миллии алоқаи барқӣ ба маблағи 909 ҳазор сомонӣ расонида шудааст.